Þessi skýrimynd varð kveikja að sambærilegum útreikningum hjá mér fyrir íslendinga. Útreikningana birti ég á sínum tíma á stórgóðri en háleynilegri kaffigrúppu sem ég er í á Facebook en niðurstöðunum ætti auðvitað að deila sem víðast.

Hallgrímskirkjur eru besti mælikvarði okkar íslendinga á stóra hluti. Hingað til hafa slíkir samanburðir nánast einskorðast við hæð eða dýpt tiltekinna fyrirbæra en augljóslega má líka mæla rúmmál í Hallgrímskirkjum.

Hér eru mínir útreikningar, ég miða við ár frekar en dag. Endilega bendið á ef ég er að fara vitlaust með eða reikna vitlaust út, gerði þessa útreikninga vel kaffivíraður í lok vinnudags.

Samkvæmt Hagstofunni er kaffi-innflutningur síðustu 12 ára að meðaltali 2.284 tonn á ári. Inn í þessu er reyndar líka kaffilíki og öll innlend ræktun er fyrir utan þetta, sem ber að hafa í huga.

• 2284 tonn = 2.284.000.000 g

• 2.284.000.000 g ÷ 55 g/l = 41.527.272 lítrar af kaffi drukknir á Íslandi á ári¹.

• 41.527.272 l ÷ 1000 l/m³ = 41.527 m³ af kaffi drukknir á Íslandi á ári².

• 41.527 m³/kaffi á ári ÷ 24.230 m³/í Hallgrímskirkju = 1.714 Hallgrímskirkjur af kaffi á ári³.

Svo við drekkum rétt tæplega tvær Hallgrímskirkjur af kaffi á ári. Betur má ef duga skal!